Este mes en MUTA propoñémosche un roteiro moi especial: Vigo, cidade e historia perdida, un percorrido polas orixes industriais da nosa cidade guiado por David Amoedo (@newtcrafts / @davidavgo).
Durante dúas horas pasearemos polo Areal e Guixar, os primeiros polígonos industriais de Vigo e punto de partida do seu espectacular crecemento ao longo do século XX. Falaremos dos Curbera, Portanet, Pumariega, Alonso, Badía…, das conserveiras e dos estaleiros que marcaron o carácter da cidade e da paisaxe que hoxe apenas se conserva.
A ruta está documentada con planos e fotografías e propón mirar Vigo con outros ollos: descubrir o que queda, lembrar o que perdemos e reflexionar sobre o noso patrimonio industrial.
O roteiro estará guiado por David Amoedo, debuxante e investigador vigués especializado en patrimonio industrial. Profesor de debuxo técnico na Universidade de Vigo e creador do proxecto “Alzados”, David leva anos estudando e divulgando a arquitectura industrial da cidade, ademais de ser coautor do libro Tranvías Eléctricos de Vigo.
O percorrido rematará en MUTA, con un viño e cunha pequena degustación de Calabizo (@calabizo_oficial) e Lamardelatas( @lamardelatas), dous proxectos galegos que recuperan o espírito da tradición conserveira e alimentaria con novas fórmulas sostibles e creativas.
Sábado 18 de novembro ás 11 h
Saída: parque María Xosé Queizán
Duración aprox. 2 h
Remate en MUTA (rúa Joaquín Loriga, 9)
con degustación de Calabizo, La Mar de Latas e un viño para acompañar
Prezo: 20 €
Reserva a túa praza en muta@muta.gal
ou no 664 697 611
Un roteiro para redescubrir Vigo e entender o que a fixo ser a capital industrial de Galicia.